வெகு நாட்களுக்குப் பின் உதய வேளையில்

 

திறந்த வான் மூழ்கி --

 

விடிந்தும் விடியாத ' சில் ' பொழுது --

 

மௌன நேரத்தில் பறவை அழைப்புகள் அங்குமிங்குமாய்

 

சிறுசிறு நீர்க்குமிழ்கள்போல்--

 

கிழக்கு மெதுவாக வெண்மை பூசிக்கொள்கிறது --

 

சரியாக 45 டிகிரி கோணத்தில் உயரே விடி வெள்ளி விழித்துப் பார்க்கிறது .

 

அதுபோல் வடமேற்கு மூலையில் அதே ' பளிச்'சில் மற்றொன்று ;

 

அது ஒரு வேளை வியாழனோ ?

 

மேலைக் கோடியிலிருந்து ஒரு ' ஜெட் ' விமானம் சப்தமின்றி

 

வானிற்கு ஒரு இடுப்புக் கச்சை இழுத்துக் கட்டி வருகிறது

 

சில நிமிடங்கள் கடந்து மற்றொன்று அதே திசையில் -

 

வானம் கிழக்கே வெட்கி கனிகிறது

 

ஒரு பலூனுள் காற்று அடைப்பதுபோல்

 

' கும்கும் ' என்று ஒளி திசைகளை நிரப்புகிறது .

 

தன மகளின் பின்னலை அவிழ்த்து வாரிவிடும் தாய் போல்

 

காற்று 'ஜெட் 'டின் கூந்தலைக் கோதி நீவி விடுகிறது.

 

கடைசியில் அது அணில் பட்டைவால் போல் ' புசுபுசு ' என்றாகி விடுகிறது .

 

இரு ஒளிக் கிரகங்களும் மெல்லப் புதைகின்றன .

 

தேடுகையில் விழிகள் தோற்கின்றன .

 

வேப்ப மரக் கூந்தல்களில் இரு அழகான பசுங்கிளிகள் -

 

சிறகை மெல்ல விரிக்கையில் செம்மஞ்சளோடிய மந்திரப் பச்சை!

 

நாசூக்காய் மெல்லக் குனிந்து வேப்பம் பழங்களை

 

அவை விரும்பி ருசிக்கையில் ஒரு புதிய சேதியும் அனுபவமும் ஆகிறது.

 

அவை செல்லும் வரை நான் சிலை ஆகிறேன் .

 

எனக்கு என் வீட்டுத் திறந்த மாடி தரும் சுகம் ,கற்பனைகள் , தோற்றங்கள்

 

வேறு எந்தப் பூங்காக்களிலும் என்னை அண்டுமோ ?

 

இங்கிருந்து என் பார்வை நீந்தலில்

 

ஒரு அழகிய தொழுகை மாடமும் கண்ணன் கோவில் கோபுரமும் !

 

சுற்றி மிதக்கும் புறாக்கள் -

 

திடீர் திடீரென வானில் அலை விரிவாய் மிதந்து உயரே

 

அமைதியாய்ப் பயணிக்கும் நீர்ப் பறவைகள் !

 

மரத் துண்டுகள் போல் அடிக்கடி முனகிச் செல்லும் விமானங்கள் --

 

உதய அந்தி வேளைச் செஞ்சூரியன்கள்--

 

உதடுகளில் கானம் ஏந்திய காற்று

 

காலையில் ' சில் 'லாய் மாலையில் ' ஜில் ' லாய் !

 

என் இரு பொழுதுகளுமே மிக இனிமையானவை !

 

 

---சந்திர கலாதர்

 

16.11.2012 / வெள்ளி / கார்த்திகை 1

 

காலை மணி 8 /அண்ணா நகர்

 

--

S.CHANDRA KALAADHAR